VINYAGO VYA SHULE VYAZUA MVUTANO MKALI GEITA.

Serikali  Mkoani  Geita,imeendelea kusisitiza kuwa itatoa  zawadi kwa shule ambazo zitafanya vizuri na zile ambazo zitafanya vibaya zitapatiwa zawadi ya vinyago hivyo walimu wametakiwa kufundisha kwa bidii ,na kuweka malengo ya ufaulu ili kuepukana na zawadi hiyo  ambayo itatolewa kwa shule ambayo itafanya vibaya kwenye mitihani ya kitaifa.

Kauli hiyo imetolewa na Afisa Elimu mkoa wa Geita Bi.Rehema Mbwilo ambaye pia ni katibu tawala msaidizi wa mkoa  alipotembelewa ofisini kwake na Blog hii kutaka kujua juu ya kauli aliyowahi kuitoa mwezi desemba mwaka jana wakati wa kutangaza matokeo ya darasa la saba na kuiagiza halmashauri  kutaandaa vinyago vitakavyowekwa kwenye meza za wakuu wa shule ambao shule zao zimefanya vibaya.

“Tunafanya hivi ili kuweza ku maintain status ya mkoa na kumfanya kila mwalimu awajibike hasahasa masomo ya sekondari ambayo kila mwalimu ana specialization yake” amesema Mbwilo.

” Sisi walimu tunapokuwa chuoni tuna aina mbili za zawadi ambazo mwanafunzi unayemfundisha darasani lazima apewe,tuna zawadi chanya na zawadi hasi….zawadi hasi ina mpa changamoto huyu aliyefanya vibaya kuongeza bidii ili aweze kufanya vizuri”Ameongeza

“La msingi walimu wafanye kazi kwa bidii ili waepukane na zawadi hasi….zawadi hizi zote mbili tutazitoa kwa walimu pamoja na maafisa elimu” Alisisitiza Bi. Rehema Mbwilo.

Kwa upande wake kaimu katibu wa chama cha walimu mkoa wa Geita Mwl.John Kafimbi amelaani vikali kauli hiyo ya afisa elimu na kusema kuwa inadhoofisha utendaji kazi wa walimu kwani utaratibu huo unamdhalilisha mwalimu.

Kafimbi ameongeza kuwa vinyago hivyo kwanza vitapoteza pesa ambazo zingefanya mambo ya maana,ameitaka serikali ya mkoa ishughulikie changamoto za uhaba wa madawati,vyumba vya madarasa,nyumba za walimu pamoja na madeni wanayodai walimu badala ya kuwaza kutengeneza vinyago.