KATAA KUWA MTI.

Na Paul William

Leo ni siku ya 19 tangu mwaka huu uingie,yapo mengi tumeshuhudia katika kipindi hiki kifupi yakiendelea katika Nyanja za siasa,kijamii na hata kiuchumi lakini si lengo langu hasa kuzungumzia masuala ya kisiasa bali nataka niongee na maisha yako moja kwa moja.

Inawezekana yapo mambo na mipango mingi uliyojiwekea katika mwaka huu kwamba mpaka kufikia disemba uwe umekamilisha,ni jambo zuri kabisa wala sikatai lakini shida yangu inakuja pale ambapo tumekuwa watu wa kuweka mipango yetu na malengo iwe ya muda mrefu au ya muda mfupi na kujikuta muda tuliojiwekea unakwisha bila kufanya lolote.

Binafsi ni mhanga wa hilo kwa muda mrefu lakini nimekaa na kuwaza sana ni kwa nini inakuwa hivi!! Ndipo nilipogundua jambo moja baada ya kukaa na kutafakari KWA MUDA MREFU NIMEKUWA MTI ndio “mti” wengi wetu tumebaki palepale licha ya mazingira kubadilika.

BAADHI YA SIFA ZA MTI

Mti ni mmea ambao una sifa nyingi,ikiwemo kujitafutia chakula chake wenyewe,kutafuta mwanga(ukiweka mmea kwenye giza utaona unapinda kuelekea mwanga ulipo)

Pamoja na sifa zote za mti ama mmea utashangaa kuwa huwa unafanya mambo yote haya huku ukiwa palepale shina haliwezi kuhama. Ndivyo ilivyo katika maisha ya baadhi ya wengi wetu ,tumekuwa watu wa kuzungumza na si kuchukua hatua ama tunaona mambo hayaendi sawa pale tulipo tunaendelea kung’ang’ana kama mti badala ya kujongea kutafuta fursa nyingine,Mfano mzuri ni kwa mtu aliyeajiriwa katika kampuni Fulani mshahara mdogo,matusi na masimango toka kwa mabosi wake na mambo mengine kama hayo lakini utashangaa mtu huyu yupo palepale leo ni mwaka wa kumi na maisha yake hayasongi kisa anaogopa akiacha kazi hiyo atahangaika na kitaa.! Matokeo yake ameishia kuwa mtu wa mawazo na  vidonda vya tumbo visivyoisha huku familia na watoto wakimtazama na matokeo yake vifo vya ghafla kabla ya wakati.

Ndugu yangu mimi binafsi tangu nimalize kidato cha nne nimekuwa mtu wa kuhangaika huku na kule nikitafuta kuajiriwa nilianza na ajira migodini nikaacha,nikaja katika mambo ya kufundisha  shuleni English medium nikaacha na sasa nipo katika redio,lakini kote ambako nimepita hali ni ileile;

Kwanza mshahara hautoshi,pili masimango toka kwa mabosi lakini pia kukosa uhuru wa kufanya mambo yangu binafsi.Ndipo nimekaa chini nakujiuliza sana nikagundua hakuna nililofanya zaidi ya kununua kitanda na kiwanja na kuishia katika kutimiza mahitaji madogo kama chakula na kodi ya nyumba huku nikiendelea kuwa mtumwa wa watu,nilikumbuka msemo usemao “UKISHINDWA KUTIMIZA NDOTO ZAKO,UTAAJIRIWA KUTIMIZA NDOTO ZA WENGINE”

Mwenzenu NIMEKATAA KUWA MTI nimeamua kuchukua hatua na kuachana na masuala ya kuajiriwa na kuamua kufanya biashara zangu mwenyewe.

Unaweza kupatwa na adha katika eneo lako la kazi kama kusingiziwa,kunyanyaswa ama hata kufukuzwa,nataka nikuambie kuwa Mungu akitaka kukuinua kukupeleka hatua nyingine huwa hana namna zaidi ya kukung’oa kwa nguvu pale ulipo kupitia hao hao ulio nao.

Nikutakie siku njema na wikendi njema lakini kumbuka hili siku zote “UKITAKA KUFANIKIWA KATIKA MAISHA YAKO,KATAA KUWA MTI”