TARIME KUANZA KILIMO CHA MASHAMBA MAKUBWA YA MIWA.

Serikali wilayani Tarime mkoani Mara,imetangaza kuanza kulima mashamba makubwa ya zao la miwa,ikiwa ni pamoja na ujenzi wa kiwanda kikubwa cha kuchakata zao hilo,ili kuwezesha uzalishaji wa sukari kama moja ya mkakati wa wilaya wa kuwapatia wananchi wa wilaya hiyo zao mbadala na hivyo kuachana na kilimo cha zao haramu la bangi.

Akitangaza mpango huo ambao utawezesha watu elfu hamsini kupata ajira,mkuu wa wilaya ya Tarime Bw Glorious Luoga,amesema tayari mpango wa uwekezaji wa kilimo hicho umekamilika,huku uongozi wa wilaya ukitenga ardhi yenye ukubwa wa zaidi ya ekari 150,000, kwa ajili ya kilimo cha zao hilo la biashara.

Kwa sababu hiyo mkuu huyo wa wilaya ya Tarime,amesema kuwa kuanzishwa kwa kilimo hicho cha miwa katika eneo la Tarime,ni moja ya mkakati wa wilaya katika kupambana na kilimo cha zao haramu la bangi.

Hata hivyo kiongozi huyo wa serikali wilayani Tarime,amesema katika kuinua hali za wananchi wa wilaya ya Tarime kiuchumi,uongozi wa wilaya umekubaliana na kampuni ya uchimbaji wa madini ya Acacia,kuanzisha mashamba makubwa ya ushirika kupitia kilimo hicho zao hilo la miwa.