Wazawa wa mkoa wa Kagera washauriwa kuguswa na madhara ya tetemeko la ardhi.

Mkuu wa mkoa wa Kagera Meja Jenerali mstaafu Salum mstapha Kijuu amewashauri wazawa wa mkoa wa Kagera wanaoishi katika maeneo mbalimbali yaliyoko hapa nchini na nje ya nchi wenye uwezo kiuchumi kuguswa na athari iliyowakumba wananchi wanaoishi katika mkoa huo iliyotokana na tetemeko la ardhi lililotokea mkoani humo kusababisha madhara makubwa ambayo ni pamoja na uharibifu mkubwa wa nyumba za makazi pamoja na vifo vya watu 17.

Mkuu huyo wa mkoa ametoa ushauri huo kwa nyakati tofauti wakati akipokea misaada mbalimbali ya kibinadamu inayoendelea kutolewa na makampuni, taasisi za kiserikali na zile za binafsi, amesema mwikitiko wa wazawa wa mkoa huo katika kutoa misaada ya kibinadamu kwa waathirika wa tetemeko la ardhi hauridhishi ukilinganisha na uwezo walionao kiuchumi baadhi ya wazawa wa mkoa huo.

Kauli ya mkuu wa mkoa wa Kagera imeungwa mkono na mbunge wa jimbo la Bukoba mjini Wilfred Lwakatare ambaye amewahimiza wananchi katika mkoa wa Kagera kuwa kitu kimoja katika kukabiliana na janga hili.

Mkuu wa mkoa wa Kagera meja jenerali mstaafu Salumu mstapha Kijuu ameendelea kupokea misaada mbalimbali ya kibinadamu toka kwenye taasisi binafsi, makampuni na mashirika, misaada aliyoipokea leo ni ile iliyotolewa na kampuni ya Maurel et Prom iliyotoa shilingi milioni 20, umoja wa wafugaji uliotoa mifuko ya saruji 400 na shirika la Kolping lililotoa mahema 100, baadhi ya wawakilishi wa taasisi mashirika yaliyotoa misaada wanaeleza walivyoguswa na athari za tetemeko hilo.