Serikali ya Kenya yakabidhi msaada kwa waathirika wa tetemeko la ardhi Kagera.

Serikali ya nchi ya Kenya imekabidhi msaada wa hisani kwa waathirika wa tetemeko la ardhi lililotokea katika mkoani Kagera na kusababisha madhara makubwa ambayo ni pamoja na vifo.

Msaada uliotolewa na serikali hiyo ni pamoja na mabati bando 4,000, magodoro 100 na mablanketi 400 ambavyo kwa pamoja vimekabidhiwa na balozi wa Kenya nchini Tanzania Chirau Ali Mwakwere kwa mkuu wa mkoa wa Kagera meja jenerali mstaafu Salum Mstapha Kijuu, akizungumza baada ya kukabidhi msaada amesema nchi hiyo imeguswa na madhara ya tetemeko pia imetoa msaada huo kwa kuzingatia mahusiano mazuri baina ya nchi hizo mbili.

Kwa upande wake, mkuu wa mkoa wa Kagera, meja jenerali mstaafu Salum Mstapha Kijuu ameshukuru msaada uliotolewa na nchi hiyo na kueleza kuwa misaada zaidi bado inahitajika kwa kuwa madhara ya tetemeko ni makubwa, naye waziri wa nchi ofisi ya waziri mkuu sera, bunge, ajira na walemavu, Jenista Mhagama amemueleza balozi huyo hatua mbalimbali ambazo zimeishachukuliwa na serikali baada ya kutokea kwa tetemeko hilo.