Serikali yatoa siku 30 kwa wachimbaji wadogo Mwasabuka kuondoka.

Zaidi ya wachimbaji wadogo 300 waliovamia eneo la mwekezaji katika eneo la Mwasabuka wilayani Nyanhwale Geita wameamriwa kuondoka katika eneo hilo ndani ya siku 30 na kujiandikisha katika vikundi ili taratibu za kupewa maeneo mengine ya zifanyike.

Maagizo hayo yametolewa na Naibu Waziri  Ofisi ya Makamu wa Rais,Muungano na mazingira Mh.Luhaga Mpina wakati alipotembelea machimbo hayo yaliyopo katika kijiji cha Mwasabuka, kata ya Mwingiro wilayani ya Nyanghwale Geita.

Naibu Waziri huyo amejionea uharibifu wa mazingira unaofanywa na mrundikano wa watu waliovamia eneo hilo lenye leseni ya kampuni uchimbaji wa madini ya Acacia ambao wanaendesha shughuli za uchimbaji madini kinyume cha sheria na kutiririsha maji yanayodhaniwa kuwa na madini ya zebaki katika mashamba na visima vya maji yanayotimika kwa matumizi ya binadamu.

Akitoa taarifa ya wilaya kwa Naibu waziri huyo, mkuu wa wilaya ya Nyanghwale Bw.Hamim Gwiyama amesema uvamizi huo unakwamisha maendeleo ya jamii huku mratibu wa baraza la taifa la usimamizi na uhifadhi wa mazingira (NEMC )Kanda ya ziwa Jamal baruti akidai kuwa sheria za mazingira haziruhusu ukataji wa miti hovyo wala uhalibifu wa aina yoyote na mtu mwenye leseni halali hupatiwa leseni kwa masharti yakutunza mazingira.

Nao baadhi ya wachimbaji wadogo katika eneo hilo wamemuomba Naibu Waziri waachiwe eneo hilo wachimbe ili kujipatia ridhiki kwakuwa wao wanachimba juu na mwekezaji anachimba chini kwa chini na hakuna mwingiliano wowote.