KAPUFI:MSISUBIRI SERIKALI IFANYE KILA KITU.

Mkuu wa wilaya ya Geita Mwl Herman Immakulata  Kapufi amewataka wananchi wa kata ya Rwamgasa kuendelea kujitolea katika suala la kuchangia maendeleo na kuacha tabia ya  kuitegemea serikali kwa kila kitu.

Ameyasema hayo wakati alipokuwa katika mkutano wa hadhara na wananchi wa  kata ya Rwamgasa Wilayani hapa uliokuwa na lengo la kusikiliza kero za wananchi.

Mkuu huyo wa Wilaya ameiomba jamii kushirikiana na serikali hasa katika miradi ya maendeleo pamoja na elimu.

“Na hasa hapa Rwamgasa kuna changamoto nyingi,changamoto ya kwanza ni changamoto ya elimu,nilikuwa nipo pale shule ya msingi Mwenge ina madarasa nane ina nyumba za walimu mbili ina walimu 22 inahitaji madarasa 36 lakini ina madarasa 8 na ina upungufu wa madawati 222.”Alisema DC Kapufi.

Hivi karibuni kulikuwa na zoezi la uchangiaji wa madawati ambalo baadhi ya watu walijitoa kwa moyo wa kupenda lakini  bado changamoto ni kubwa hasa katika vyumba vya madarasa ikizingatiwa kuwa mwaka huu ni idadi kubwa ya watoto walioandikishwa kujiunga na darasa la kwanza ikilinganishwa na miaka ya nyuma,na hii ni kutokana na sera ya serikali ya awamu ya tano ya Elimu bure.